Starfsemi

Hlutverk GAJU er að breyta matarleifunum í metangas og moltu og koma um leið í veg fyrir mikla losun gróðurhúsalofttegunda í andrúmsloftið. Sérsöfnun á matarleifum hófst á höfuðborgarsvæðinu um mitt árið og seinni hluta árs hætti GAJA alfarið að taka við forflokkuðum heimilisúrgangi til gasgerðar. Skilyrði fyrir því að framleiða moltu voru því loks til staðar seinni part ársins og hófst þá umsóknarferli um leyfi frá MAST til að mega markaðssetja moltuna. Framleiðsla metans gekk vel á árinu en hreinna hráefni til moltuvinnslunnar skilar einnig hlutfallslega meira magni af gasi.

Góði hirðirinn flutti í nýtt og stærra húsnæði að Köllunarklettsvegi 1 í upphafi árs 2023. Húsnæðið er 2000 m2 að stærð og skapar aukna möguleika á að finna notuðum hlutum nýtt heimili og þar með lengja líftíma þeirra í takt við tilgang og markmið hringrásarhagkerfisins. Flutningarnir hafa skilað 53% aukningu í endurnotum milli ára.

Tilgangur markaðarins er að koma efni í endurnýtingu- eða notkun áður en það fer til endurvinnslu en það er mikilvægt til að nýta auðlindir okkar sem best. Á markaðinum er boðið upp á efni eins og timbur, timburhluti, hurðar, glugga, innréttingar, hellur, flísar, trjáboli, vaska, parket, dekk, reiðhjól, vörubretti og brúsa svo fátt eitt sé nefnt. Hagnaður sem kann að verða af sölu efna rennur til góðra málefna

Árið 2023 hóf SORPA sérsöfnun á plasti á endurvinnslustöðvum í fjórum flokkum: plastumbúðum, plastfilmu, hörðu plasti og frauðplasti. Þessi flokkun hefur í för með sér betri endurvinnslu og jókst heildarmagn plasts sem SORPA sendir í endurvinnslu um rúm 80%; úr tæplega 1.700 tonnum í 3.078 tonn.

Hjá móttöku og flokkunarstöð millilendir næstum því allur úrgangur sem kemur til SORPU, áður en hann er sendur í réttan farveg. Í lok árs hófst útflutningur á blönduðum úrgangi til orkuvinnslu og urðun á blönduðum úrgangi var hætt. Orkuvinnsla er mun skárri leið til að meðhöndla rusl en að urða það. Með þessu færum við rúmlega 40.000 tonn af úrgangi skör ofar í meðhöndlun, því urðun er það versta sem þú getur gert við rusl og er orkuvinnsla einu skrefi ofar og flokkast sem endurnýting.

Í lok ársins hætti urðunarstaðurinn að taka við lífrænum og blönduðum úrgangi og er stefnt að því að draga úr urðun um að minnsta kosti 70% árið 2024. Við það að hætta að urða blandað rusl og lífrænan úrgang í Álfsnesi má einnig gera ráð fyrir að losun gróðurhúsalofttegunda frá urðunarstað SORPU dragist saman um 80% á næstu 10 til 15 árum.